venres, 23 de xullo de 2010

Mentres Galicia se dispón a celebrar as festas do Apóstolo, do día de Galicia e dos 25 anos de TVG, Cultura 10 tamén ten moito que festexar, xa que este sábado emítese a décima edición do espazo.
O novo espectáculo da compañía Nova Galega de Danza, que se estreou estes días na Praza da Quintana, e a Banda de Visantoña, unha das históricas de Galicia, son protagonistas deste programa xunto coas terras de Arzúa, que hoxe vai percorrer o reporteiro indio Anick Nandi.
Ademais, un convidado 10, o gaiteiro Xosé Manuel Budiño conversa en primeira persoa con Luísa Castro... e para estar ao día do que pasa en Galicia... a axenda de Cultura 10!

venres, 16 de xullo de 2010

Este sábado Cultura 10 achégase ata o estudio de arquitectura A-0, un dos máis vangardistas da península que empezou na Coruña e xa ten unha sede en Madrid.
Os reporteiros do programa vanse achegar aos distintos concertos que se celebran estes días como o de Norah Jones, Ben Harper e o da incombustible Nacha Guevara.
Ao reporteiro indio Anik Nandi non hai quen o pare. Continuando co seu percorrido por Galicia, nesta ocasión vaise deter na Fervenza do Toxa.
E mentres os escritores galegos máis novos rompen co tópico de que ós mozos non lles gusta escribir, Luísa Castro entrevista unha das mulleres que máis saben de cultura en Galicia: María Pereira, a directora de programación da obra social de Caixanova.

venres, 09 de xullo de 2010

Este sábado o programa achégase á Rapa das Bestas de Sabucedo para mostrar a estrea no curro dos aloitadores máis novos. O último grito en gastronomía chéganos da man dun dos compoñentes do Grupo Nove: Pepe Solla. No eido da música dous festivais son os protagonistas: o Vigo Transforma, que pretende causar o mínimo impacto ambiental e unha cita obrigada: o de Ortigueira.
Luísa Castro entrevista a actriz franco-palestina Yasmine Al Massri, protagonista da película Caramel, que está pasando unha tempada en Galicia. E para saber todo o que pasa estes días na nosa comunidade: a axenda de Cultura 10.